சார்பட்டா பரம்பரை- திரை விமர்சனம்.

A.G. சிவக்குமார்

May be an image of 6 people, beard and text

சார்பட்டா 2.5/5தலைவரை வைத்து காலா எனும் ஃப்ளாப் படத்தை தந்த ரஞ்சித் மூன்று ஆண்டுகளுக்கு பிறகு கோதாவில் குதித்துள்ளார். முதலில் இக்கதை சூர்யாவிற்கு சென்று ஓகே ஆனது என்றார்கள். ஆனால் ஏனோ அடுத்த கட்டத்தை நோக்கி நகரவில்லை. ரஞ்சித்திடம் இணைய வேண்டும் என்பது ஆர்யாவின் நீண்ட நாள் விருப்பம். அது தற்போது நிறைவேறியுள்ளது.

ப்ளஸ்:* முதல் பாதிவரை ஹாலிவுட் ஸ்போர்ட்ஸ் படத்திற்கு இணையான படத்தை பார்த்த பிரமிப்பு.* ஆர்யா, பசுபதி, வேம்புலி, ராமன், ராமனின் மாமா, டான்சிங் ரோஸ் ஷபீர், அவரது தாயாராக வரும் அனுபமா, டாடி ஜான் விஜய், கலையரசன், அவரது மனைவி, பழைய ஜோக் தங்கதுரை, பீடி ராயப்பன் என பொருத்தமான காஸ்டிங். அதை எந்தளவிற்கு கச்சிதமாக பிரதிபலித்தார்கள் என்பது பின்வரும் பகுதியில் குறிப்பிடப்பட்டுள்ளது. *

ஒளிப்பதிவு, கலை, இயக்கம், சண்டைப்பயிற்சி, காஸ்ட்யூம், சிகை மற்றும் மேக்கப் என முக்கியமான தளங்கள் சிறந்த தரம்,* முதல் பாதி திரைக்கதை மற்றும் வசனங்களில் ரஞ்சித்துடன் இணைந்து எழுத்தாளர் தமிழ்ப்பிரபா சிறந்த பணியை ஆற்றியுள்ளார். ‘பொல்லாதவள் ஆகி என்ன பண்ணிடுவ?’ எனும் வசனம் ஒரு சோறு பதம்.* ஹாலிவுட் இசையை அலேக்காக தூக்கி இங்கே இயக்கியுள்ளார் சந்தோஷ். ஓவராக வாசிக்காமல் இருந்திருப்பது பெரிய ஆறுதல்.*

தேவையற்ற கிளைக்கதைகள், ஆர்யாவுக்கென லவ் டிராக் என தடம் மாறாமல் பாக்சிங் ரிங்கை சுற்றியே களமாடி இருப்பது மகிழ்ச்சி.* பூலோகம், இறுதிச்சுற்று உள்ளிட்ட மொக்கை பாக்சிங் படங்களை ஒப்பிடுகையில் சார்பட்டா பல அடி மேலே இருக்கிறது.* ரஞ்சித் இயக்கிய ஒரு படம் கூட சாதிய, ஏற்றத்தாழ்வுகளை அடித்து பேசியதில்லை. எல்லாமே ஈயப்பூச்சுகள்தான். ஒன்று.. இங்கு நடைபெறும் அவலங்களை அடித்துப்பேச வேண்டும் அல்லது மையக்கதையை நோக்கி பயணிக்க வேண்டும். இம்முறை ஓரிரு இடங்களில் இப்படியான வசனங்களை வைத்துவிட்டு கதையில் மட்டுமே கவனம் செலுத்தி இருப்பது சிறப்பு.

மைனஸ்:* பிரமாதமான முதல் பாதிக்கு பிறகு ஜவ்வு மிட்டாய் போல நகர்கிறது. திரைப்படமாக வந்திருந்தால் அரைமணிநேரம் ட்ரிம் செய்திருப்பார்கள். OTT என்பதால் மூன்று மணிநேர படத்தை அப்படியே இறக்கி விட்டார்கள். முடியல சாமி!!* ஆரம்பத்தில் குறிப்பிட்டது போல.. கேரக்டர்களுக்கான நடிகர்கள் அனைவரும் சிறந்த சாய்ஸ். அதேநேரம் சிலரது நடிப்பு அதீதமாகவும், குறைவாகவும் இருந்தது. சென்னை வட்டார வழக்கு பேசத்தெரியாத ஆர்யா, நெத்திலி மீன் போல துள்ளிக்கொண்டே இருக்கும் அவரது மனைவி, எம்.ஆர்.ராதாவை காப்பி அடிக்கும் ஜான் விஜய், சற்று அதிகமாக டான்ஸ் ஆடிய ரோஸ்.

* சிறுவயதில் ரங்கன் வாத்தியாரை கண்டு அசந்து போனவன் கபிலன். பாக்ஸர் ஆக வேண்டும் என ஆசை அவனுக்குள் உள்ளூர அதிகமுண்டு. ஆனால் தாயார் அதை விரும்பவில்லை. சாதாரண தொழிலாளியாக மாத சம்பள வேலைக்கு செல்கிறான். திடீரென ஒருநாள் சிறந்த பாக்ஸர் ஒருவரை வீழ்த்துகிறார். ரங்கன் வாத்தியார் அசந்து போய் இவனை சிஷ்யனாக ஏற்றுக்கொள்கிறார்.காதுல பூ சுத்துறதுக்கும் ஒரு அளவு வேண்டாமா? கபிலன் எப்படி இவ்வளவு பெரிய பாக்ஸர் ஆனான்? யார் அவனுக்கு கோச்சிங் தந்தது? சிக்ஸ் பேக் வைத்துக்கொண்டு வேலைக்கு செல்கிறான்.

இதெல்லாம் இவனது அம்மாவிற்கு தெரியாமலா போனது?இந்த இடைப்பட்ட வளர்ச்சி குறித்து நம்பத்தகுந்த காட்சிகளை வைக்காமல் விட்டது மெகா சறுக்கல்.* 1976 இல் கருணாநிதியின் ஆட்சி நள்ளிரவில் கலைக்கப்பட்டது. அந்நேரமே மக்களிடம் தகவல் பரவிவிட்டது. ஆனால் பகலில் மேட்ச் நடக்கும்போதுதான் இத்தகவல் அனைவருக்கும் தெரிகிறது. அதுவும் ரங்கன் போன்ற உடன்பிறப்புகள் பலர் அங்கிருந்தும்? * அம்மாவும், மனைவியும் ஆர்யாவை திட்டுவது, திடீர் சாராய வியாபாரியாக மாறுவது, தைரியம் இருந்தா மோதிப்பார் என யாராவது சவால் விட்டுக்கொண்டே இருப்பது, எதிர்பார்த்த க்ளைமாக்ஸ் என கடும் களைப்பை தருகிறது இரண்டாம் பாதி

.* தலித் மக்களின் எழுச்சி நாயகனாக பேசப்படுபவர் ரஞ்சித். இவரது சீடர் மாரி செல்வராஜ் எடுத்த பரியேறும் பெருமாள், கர்ணன் படத்தில் மாஞ்சோலை போஸ்டர், 1996 முன்பு, பின்பு போன்ற காமடிகள் நடந்தன. * சார்பட்டா ஷூட்டிங் சில மாதங்களுக்கு முன்பே முடிந்து விட்டது. ஆனால் போஸ்ட் புரடக்சன் வேலைகள் அதன் பின்புதான் துவங்கும் என்பது பலரும் அறிந்தது.திமுக உறுதியாக ஆட்சிக்கு வரும் என நம்பி பாக்ஸர்கள் அணியும் மேலாடையில் உதயசூரியன் சின்னத்தின் க்ளோஸ் அப், திமுக கரைவேட்டி, துண்டுகள் என அருமையாக பிளான் பண்ணி எடுத்துள்ளார் ரஞ்சித்

.* ‘நான் கழக உடன்பிறப்பு. கைதுக்கு பயப்பட மாட்டேன்’ என முழங்குகிறார் பசுபதி.* வடசென்னையில் பாக்சிங் பிரபலமாக இருந்தபோது திமுகவினர் பலர் அதில் அங்கம் வகித்தனர் என்பது உண்மை. ஒருவேளை அதிமுக ஆட்சி மீண்டும் அமைந்திருந்தால் இதே வசனம், காட்சிகளை ரஞ்சித் வைத்திருப்பாரா என்பதுதான் கேள்வி. ஜெயலலிதா முதல்வராக இருந்திருந்தால்…. அனைத்தும் நறுக்கப்பட்டிருக்கும் என்பதே நிஜம்.* ஆர்யா தாக்கப்பட்டு மருத்துவமனையில் இருக்கிறார். அப்போது ஜான்விஜய் பேசுகிறார் இப்படி: ‘எமர்ஜன்சி போட்டுவிட்டார்கள். கருணாநிதியின் மகன் ஸ்டாலினை கூட மிசாவில் அரெஸ்ட் செய்து விட்டார்கள். பாவம்’இந்த வசனம் வரும்போது ஜான் விஜய்யின் முகம் இல்லை. கருணாநிதியின் அரசியல் க்ளிப்பிங் கருப்பு வெள்ளையில் ஓடுகிறது. ஆகவே திமுக ஆட்சி அமைந்த பிறகு போஸ்ட் புரடக்சனில் டப்பிங் மூலம் இந்த வசனத்தை சேர்த்திருப்பதாக தெரிகிறது

.* இதையெல்லாம் நம்ப முடியாது என்று நீல சங்கிகள்…. சாரி திடீர் உடன்பிறப்புகள் கூவலாம். அவர்களுக்கு ஒரு செய்தி.* மாரி செல்வராஜ் இயக்கத்தில் உதயநிதி நடிக்கும் அடுத்த படத்தை பா.ரஞ்சித் தயாரிக்கிறார். ஏ.ஆர். ரஹ்மான் இசை எனும் தகவல் ஓடிக்கொண்டு இருக்கிறது. பொறுத்திருந்து பார்ப்போம்.

* காலத்திற்கு ஏற்ப கலர் மாற்றுவதுதான் அம்பேத்கரிஸமா?சார்பாட்டா மற்றும் இயக்குனர் ரஞ்சித் பற்றி மேலும் சில பல பதிவுகள் வரக்கூடும். நீல சங்கியாக இருந்து திடீர் உடன்பிறப்பாக மாறியவர்களுக்கு பிடிக்கவில்லை என்றால் எனது பதிவுகளை ஸ்கிப் செய்யுங்கள் அல்லது Unfriend/Block செய்து விடுங்கள்.மூன்று மணிநேரம் பார்க்கும் பொறுமை இருப்பவர்கள் பாருங்கள். இல்லாவிட்டால் முதல் ஒன்றரை மணிநேரம் பார்த்துவிட்டு க்ளைமாக்சிற்கு தாவி விடுங்கள்.

நன்றி: A.G.சிவக்குமார் முகநூல் பக்கம்.

பெங்குயின்! திரை விமர்சனம்!

பெங்குயின்!  திரை விமர்சனம்!

ரிதம் எனும் பெண்ணின் மகன் காணாமல் போய், ஆறு வருடங்களுக்குப் பின் கிடைக்கின்றான். அவனை யார் கடத்தினார்கள், அந்தச் சிறுவனுக்கு என்ன நேர்ந்தது எனத் தெரிந்து கொள்ள ரிதம் நினைக்கிறார். அவரால் அதைத் தெரிந்து கொள்ள முடிகிறதா என்பதுதான் படத்தின் கதை.

“ஓப்பன் பண்ணா, காட்டுக்கு நடுவுல ‘மதர் ஆஃப் நேச்சர்’ சிலை. ஒரு கருப்பு நாய், தத்தித் தத்தி நடக்கும் சின்ன பையன், சிலைக்குப் பின்னாடியிருந்து மஞ்சள் நிறக் குடையில் சார்லி சாப்ளின் முகமூடி அணிந்த கொலைகாரன். அதோடு படம் சரி” என பெண்குயின் பார்வையாளர்களைத் தெறிக்க விட்டுள்ளது.

படத்தோடு ஒன்ற முடியாமல், தொடக்கத்தில் இருந்தே ஓர் அந்நியத்தன்மை இழையோடுகிறது. என்ன தான் விஷூவல்ஸில் அசத்தியிருந்தாலும், தட்டையான கதாபாத்திரங்களை மீறிப் படத்தில் கவனம் செலுத்த இயலாமல் போகிறது. சுமார் ஆறு வருடங்களுக்குப் பின் கிடைத்த மகனைத் தனி அறையில் படுக்க வைப்பதெனும் கலாச்சாரமே பெரும் அதிர்ச்சியை ஏற்படுத்துகிறது. ஹாலிவுட்டின் சூப்பர் ஹீரோக்களே, தங்கள் மகிமைகளைப் புறந்தள்ளிவிட்டு, வில்லன்களிடம் அடி வாங்குகிறார்கள், இறக்கவும் செய்கிறார்கள். இப்படத்தில், கர்ப்பினிப் பெண்ணான நாயகியோ ஒரு சிறு பதற்றமும் இல்லாமல் நடமாடிய வண்ணமே உள்ளார்.

மகனின் நினைவுகளிலே ஆறு வருடங்களாகத் தவிக்கும் நாயகிக்கு, ஒரு துப்பு கிடைக்கிறது. உயிருக்குப் பயப்படாமல் பல சாகசங்கள் புரியத் தயாராக இருக்கும் நாயகி, கிடைக்கின்ற அந்தத் துப்பை அலட்சியமாக விட்டுவிட்டுச் செல்கிறார். தவறவிட்டார் என்ற அளவுக்காவது அந்தக் காட்சியில் பதற்றத்தைக் கொண்டு வந்திருக்கவேண்டும். கார்த்திக் பழனியின் ஒளிப்பதிவு கொடைக்கானலின் அழகிலேயே மயங்கிக் கிடக்கிறதே தவிர, கதாபாத்திரங்களின் உணர்ச்சியைக் கோட்டை விட்டுவிடுகிறது. பிளாஸ்டிக் தன்மையோடு மனிதர்கள் நடமாடுகிறார்கள். கீர்த்தி சுரேஷிடம் கூட ஒரு பதற்றம் இருக்கிறதே தவிர, அஞ்சனா எனும் சிறுமியின் தாயிடமிருந்த பதைபதைப்பு மிஸ்ஸிங். கீர்த்தியின் முதல் கணவராக வரும் லிங்காவும், அஜயாக நடித்திருக்கும் மாஸ்டர் அத்வைத்தும்தான் ஆறுதல் அளிக்கின்றனர். பெரியவர்களின் அனைத்துச் சொதப்பல்களையும் முடிந்தளவுக்குத் தோளில் தாங்கி அசத்தியுள்ளார் அத்வைத்.

படத்தின் இன்னொரு மிகப் பெரும் சறுக்கல், கதாபாத்திரங்களுக்கு இடையேயான ரிலேஷன்ஷிப். மேடை நாடகத்தில் தனது காட்சிக்காகக் காத்திருந்து, மேடைக்கு வந்து செல்பவர்கள் போலவே, ஃப்ரேம்க்குள் காத்திருந்து உள் நுழைகிறார்கள். ஓகே, நம்ம சீன் முடிஞ்சிடுச்சுஎன டயலாக் பேசியதும் கிளம்புகிறார்கள். அநாதை ஆசிரமத்தில் வளர்ந்த கீர்த்தி சுரேஷ், கையில் சங்கிலியில் கட்டப்பட்டுக் கொடுமைக்கு உள்ளாகி ஆறு வருடம் கழித்துக் கிடைத்த மகனை, அன்றிரவே தனி அறையில் படுக்க வைக்கிறார். அதற்கு முன், வீட்டுக்கு வெளியில் கீர்த்தி சுரேஷ் புன்னகைக்கும் முகத்துடன் ஹோஸ்-பைப் கொண்டு அவன் முதுகில் நீரடித்து சுத்தம் செய்கிறார், அப்படியே நாயையும் அதே போல் சுத்தம் செய்கிறார். சொந்த மாநிலத்திற்கு நடந்து வந்த கூலிப் பணியாளர்களை உத்திர பிரதேச அரசாங்கம் நிற்க வைத்து மருந்து தெளித்ததை விட மிகக் கொடுமையான செயல் இது. ஒரு பெண் தன் தோழிகளுடன் தனித்திருக்கும் சமயத்தில் எப்படிப் பேசுவார், கணவனுடன் எப்படிப் பேசுவார், நீண்ட நாட்களுக்குப் பின், தொலைந்துவிட்ட மகன் கிடைக்கும் பொழுது எப்படி நடந்து கொள்வார் என்று எந்த அக்கறையும் கவனமும் கொள்ளாமல் காட்சிகளை அமைத்துள்ளார் இயக்குநர் ஈஷ்வர் கார்த்திக்.

போதாக் குறைக்கு, அன்லிமிடெட் பொங்கலைச் சாப்பிட்டது போல் ஒரு சைக்கோ வில்லன் (அதே கடையில்தான், இரண்டாவது கணவர் கெளதமாக நடித்திருக்கும் மாதம்பட்டி ரங்கராஜும் பொங்கல் வாங்கிச் சாப்பிட்டுள்ளார் என்பதைச் சுலபமாக யூகிக்க முடிகிறது). பேசுறது, நடக்கிறது, சிரிக்கிறது என அனைத்தையும் ஸ்லோ-மோஷனில் செய்கிறார் அந்த சைக்கோ டாக்டர். கையும் களவுமாக மாட்டிக் கொண்ட பிறகும் கூட, அவரிடம் உள்ள அந்த பொங்கல் எஃபெக்ட் குறையாததால் மிக மொக்கையாக மாட்டிக் கொள்கிறார். பதினாறு கொலைகள் செய்த அந்தக் கொலைகாரனின் பொங்கல் மயக்கம் கொஞ்சம் தீர்ந்ததும், விக்ரம் வேதா பாணியில் நாயகிக்கு அவரது மகனைக் கடத்தியது யாரெனத் துப்பு தருகிறார். அட கொலைகார நாயே உனக்கென்னடா இவ்ளோ அக்கற?” என்று பார்வையாளர்கள் மனதில் எழும் கேள்விக்கு, ‘ஏன்னா எனக்கு நாயகியின் தைரியம் ரொம்பப் பிடிக்கும்என்று சொல்கிறார். இதற்கு அது பதிலில்லையே எனக் கொலக்காண்டு ஆகிறது.

பார்வையாளர்களை ஒரு வழி செய்துவிட்டு, ஒருவழியாகப் படம் சுபமாக முடிந்ததே எனப் பார்த்தால், கீர்த்தி சுரேஷ் தனது மகனுக்கு “பெண்குயின்” கதை சொல்லுவதாகத் தலைப்பைக் கொண்டு வந்து க்ளைமேக்ஸில் முடிச்சுப் போட்டுள்ளனர். ஏன் இந்தப் படத்துக்கு ‘பெண்குயின்’ என்று தலைப்பு வைத்தார்கள் எனப் பார்வையாளர்கள் குழம்பி விடக் கூடாது என நினைக்கும் இயக்குநரின் அந்தத் “தாய்” மனம் இருக்கில்ல? ப்ப்பாஆஆ.. எங்கேயோ போய்விட்டது தமிழ் சினிமா.      நன்றி: https://ithutamil.com/

பொன்மகள் வந்தாள் – விமர்சனம்.

 ‘நீதி வழங்குவதற்கு சாட்சியை விட உண்மை தான் முக்கியம்.’ -ஓங்கிச் சொல்கிறாள் ‘பொன்மகள் வந்தாள்.’பெட்டிசன் பெத்துராஜின் மகளான வெண்பா பதினைந்து ஆண்டுகளுக்கு முன்பு சைக்கோ குற்றவாளி என்று போலீஸாரால் சுட்டுக்கொள்ளப்பட்ட சத்யஜோதிக்கு ஆதரவாக நீதிப்போராட்டத்தைத் துவங்குகிறாள். அங்கிருந்து படம் துவங்கிறது.

பெண் குழந்தைகளைக் கடத்திக் கொலை செய்யும் சைக்கோ குற்றவாளி என்று நம்ப வைக்கப்பட்ட இறந்து போன சத்யஜோதியை நிரபராதி என நிரூபிக்கப் போராடும் வெண்பாவிற்கு சத்யஜோதி யார்? அதிகாரமும் பணபலமும் நீதியை தன் வீட்டு வேலைக்காரன் போல நடத்தும் காலத்தில் வெண்பாவின் அன்பான நீதி எப்படி வென்றது? இதற்கான பதிலை இரண்டு மணி நேரத்தில் மிக நேர்த்தியாகச் சொல்லியிருக்கிறார்கள்.வெண்பாவாக ஜோதிகா. ஜாக்பாட் ஜோதிகாவை லாக்டவுன் செய்து சீரியஸ் ஜோதிகாவை லாகின் செய்து அசத்தி இருக்கிறார். எவ்வளவு பெரிய நடிகரையும் தன் வசீகர வசனத்தால் ஓரங்கட்டும் பார்த்திபனையே சில பன்ச்களில் ஜோதிகா தெறிக்க விடுவதெல்லாம் அல்டிமேட் ரகம். படத்தில் ஜோதிகா பார்த்திபனின் வாதப்பிரதி வாதங்கள் ஜோர் ஜோர். பாக்கியராஜ் தனது வேலையைச் செவ்வனே செய்ய, நீதிபதியாக வரும் பிரதாப் போத்தன் மிக அழகாக நடித்துள்ளார்.பாண்டியராஜனுக்கு பெரிய வேலை இல்லாவிட்டாலும் பிரதாப் போத்தனுக்கும் அவருக்குமான காட்சிகளில் ஸ்கோர் செய்துவிடுகிறார். தியகாராஜன் செய்யும் வில்லனத்தனம் ரசிக்கும் படியாகவே இருக்கிறது.

மெலிதாக சோகம் இழையோடும் கதை என்பதை அவ்வப்போது கோவிந்த் வசந்தாவின் பின்னணி இசை நினைவூட்டுகிறது. ஊட்டியின் மலையழகையும் மலர் அழகையும் மழலையின் அழகாய் காட்டியுள்ளார் ஒளிப்பதிவாளர்.படம் தாங்கி நிற்கும் கதை நம் நாட்டில் பெரும்பாலான பெண் குழந்தைகள் படும் வதை. இங்கு நிறைய குழந்தைகள் தங்களுக்கு நடக்கும் பாலியல் அத்துமீறலைச் சொல்லத்துவங்கினால் நிறைய முகமூடி நல்லவர்களின் உண்மை முகம் அசிங்மாகி விடும். இந்தப்பொன்மகள் வந்தாள் அப்படியான காமவெறி போலிகளை எச்சரிக்கச் வந்திருக்கிறாள்.ஆஷிபாக்களையும், நந்தினிகளையும், ஹாசினிகளையும் நினைவூட்டும் படம் பொள்ளாச்சி காமக் கொள்ளையர்களையும் அவர்களைத் தப்பிக்க வைக்கப் அயராது உழைக்கும் சுயநல வர்க்கத்தையும் தோலுரித்துக் காட்டுகிறது. வெல்டன் பிரெட்ரிக்!

‘பா’க்களில் வெண்பா எழுதுவது தான் மிகப்பெரிய கஷ்டம். ஆசிரிப்பாவில் சமரசம் செய்து விட முடியும். வெண்பாவில் அது முடியாது. சீர் தளை என இலக்கணம் எல்லாம் சரியாக அமைந்தால் தான் அது வெண்பா. இந்தப் பொன்மகள் வெண்பா அனைத்து இலக்கணத்தையும் கொண்டிருக்கிறாள். அதனால் நிச்சயம் இலக்கை அடைவாள்!இத்தனை வருட சினிமா வாழ்வில் ஒரு படம் நேரடி ரிலீஸாக அனைவரின் வீட்டிற்குள்ளும் வந்திருப்பது இதுவே முதல்முறை. அந்தப் பெருமையை அமேசான் மூலமாகப் பொன்மகள் வந்தாள் படம் பெற்றிருக்கிறது. அது வீட்டிற்குள் வைத்துப் போற்றக்கூடிய படமாகவும் இருப்பது தான் சிறப்பு!       -மு. ஜெகன்சேட்

நன்றி: http://www.startcutaction.com/

தப்பட் விமர்சனம்

பலர் பார்க்க, தன் மனைவியைப் பொதுவெளியில் அறைந்து விடுகிறான் ஒரு கணவன். அந்த மனைவி, கணவனிடம் விவாகரத்து கோருவதுதான் படத்தின் கதை. ‘தப்பட்’ என்றால் “அறை (slap)” என்று பொருள்.

‘ஆர்டிகிள் 15’ எனும் அதி அற்புதமான படத்தை இயக்கிய அனுபவ் சின்ஹாவின் படம். அதுவும் குடும்ப வன்முறையைப் (Domestic violence) பற்றிய படம் என்பதால் படத்தின் மீதான எதிர்பார்ப்பு கூடுதலாக இருந்தது. மாமியார் கொடுமை, வரதட்சணைக்காகத் துன்புறுத்தப்படுவது, வசை மாரி பொழிதல், கையை நீட்டி அடித்தல் என்ற பிசிக்கல் & வெர்பல் அப்யூஸ்கள் மட்டும் டொமஸ்டிக் வயலன்ஸில் வராது. அடிப்படை உரிமைகள் மறுக்கப்படுவது, குடும்ப நலனெனக் காரணம் காட்டி ஒருவரின் தனிப்பட்ட சுதந்திரத்தைப் பறிப்பது போன்றவையும் டொமஸ்டிக் வயலன்ஸ்தான்.

நான் கார் ஓட்டக் கத்துக்கவா?” – டாப்சி.

முதலில் ஒழுங்கா பராத்தா போடக் கத்துக்க?” – டாப்சியின் கணவன்.

இந்த உதாசீனத்தை, காது கொடுத்துக் கேட்காத மேலாதிக்க ஆண் மனநிலையை டொமஸ்டிக் வயலன்ஸெனப் பார்வையாளர்கள் மனதில் பதிந்திருக்கவேண்டிய படம், தட்டையான ஒற்றைப் பரிமாணத்தில் தன் நோக்கைத் தொலைத்து விடுகிறது. படத்தின் தலைப்பே அதற்கு சாட்சி.

ஒரு பலவீனமான சூழ்நிலையில், தன்னை மறந்து அறைந்து விடுவது டொமஸ்டிக் வயலன்ஸில் வருமா? அதற்காக விவாகரத்து என்பது சரியா என்ற கேள்வி, சற்றே சிக்கலானது. To Err is Human. அதுவும் போதையில், தன் உழைப்பெல்லாம் வீணானதெனக் கோபத்தின் உச்சியில் இருக்கும் ஒருவன் பண்பட்டவனாக நடந்திருக்கவேண்டுமென எதிர்பார்ப்பது சாத்தியமில்லாத ஒன்று. கோபம் வராத ஆணோ, பெண்ணோ உண்டா? கோபத்தில் வார்த்தையை விடாத மனிதருண்டா?

ஆனால், ஆண்களின் பிரச்சனை, மிக இயல்பான மனநிலையிலேயே டொமஸ்டிக் வயலன்ஸைக் கை கொள்வதுதான். ‘உனக்கு கார் ஓட்டக் கத்துக்க ஆசையா? சரி கத்துக்கோ’ எனச் சொல்லாமல், ‘முதலில் பராத்தா செய்ய ஒழுங்கா கத்துக்கோ. அது தான் உனக்கான வேலை. இந்தியப் பெண்களுக்கான வேலை’ எனத் தெளிந்த மனநிலையில் அவனிடம் வெளிப்படும் மூர்க்கமே வன்முறை. படம், பின்னதைப் பேசாமல், முன்னதிலேயே கவனம் செலுத்திக் கடுப்பேற்றுகிறது. ‘தன்னை அறைஞ்சது நியாயமற்ற செயல்’ என டாப்சியின் மூலம் கிளிப்பிள்ளையைப் போல் சொல்லிக் கொண்டிருக்கும் இயக்குநர், திருமணப் பந்தத்தில் பெண்ணின் சுதந்திரமும் தனித்தன்மையும் பறிக்கப்படுகிறது என்ற கருத்திற்கும் படத்தில் சம உரிமை அளித்திருக்கலாம்.

காலம், ஓர் அருமருந்து. அனைவருமே வடுக்களோடு வாழப் பழகிட்டோம். நம்மாலே 100% நாம் நினைக்கிறப்படி இருக்கமுடியாது. இன்னொருவரிடம் எப்படி எதிர்பார்க்க முடியும்? மேலும் போன தலைமுறையை விட இந்தத் தலைமுறை ஆண்கள் பரவாயில்லை என்றுதான் தோன்றுகிறது.’ தவறுகள் அம்மாக்களான எங்க மீதுதான்’ என அம்ரிதாவின் மாமியார் சொல்வார். அம்ரிதா அந்தத் தவறைச் செய்யமாட்டார் என நம்புவோமாக! வளர்ப்பையும் மீறி, ஜெனிட்டிக்கலி நிறைய manufacturing defect ஆண்களிடம் இருக்குமென்றே தோன்றுகிறது. விளக்கிப் புரிய வைக்க முடியாத பட்சத்தில், பெரிய முடிவுகளை நோக்கிப் போயிருக்கலாம்.

“A slap is unfair” என்பதில் மாற்றுக் கருத்தே இல்லை. ஓர் ‘அறை’ சகலத்தையும் நொறுக்கிவிடும், முக்கியமாக ஒருவரின் அகத்தை. அதைப் புரிய வைத்தே ஆகவேண்டும். ஆனால், அதிலிருந்து மீள (heal), அம்ரிதா தேவையான நேரம் எடுத்துக் கொண்டு, அவளது கணவன் தவறுகளைப் புரிந்து சரி செய்துகொள்ள, ஒரே ஒரு வாய்ப்பாவது வழங்கப்பட்டிருக்கலாம் என்பது பழைய பஞ்சாங்கங்களின் ஆதங்கமாய் உள்ளது. 

இலக்கைத் தைக்காத திரைக்கதைக்குக் காரணம், நாயகியின் கதாபாத்திர வடிவமைப்பு. “காதல் இருந்ததால், கணவரின் வீட்டைப் பார்த்துக் கொண்டேன். அவர் அறைஞ்சதும், அந்தக் காதல் போயிடுச்சு. இப்போ எனக்கு மரியாதையும் மகிழ்ச்சியும் வேணும்” என்கிறார். ‘என்னம்மா இப்படிப் பண்றீங்களேம்மா?’ என தலையைப் பிய்த்துக் கொள்ளத் தோன்றியது. காதல் இருக்கும் பட்சத்தில் மரியாதையும் மகிழ்ச்சியும் அங்கே என்னத்துக்கு என்ற அரிய கருத்தை ஜீரணிக்கக் கொஞ்சம் சிரமமாகத்தான் உள்ளது. ஜீவனாம்சம் கேட்பதையும் நாயகி இழுக்காக நினைப்பதாக இயக்குநர் மிக் அழுத்தமாக வலியுறுத்துகிறார். ‘அது லவ். அதனால் ஜீவனாம்சம் கேட்கக்கூடாது’ என கன்னத்தில் போட்டுக் கொள்ளாத குறையாகச் சொல்கிறார் டாப்சி.

குற்றம் நம்பர் 1: மனைவியை அறைவது தப்பு;

குற்றம் நம்பர் 2: கணவன் மீது காதலோடு வாழ்ந்துவிட்டு, பின் அந்தக் காதல் போனதும், கணவனைப் பிரிய முடிவெடுத்து மனைவி விவாகரத்து வாங்கினால் ஜீவனாம்சம் கேட்பது தவறு.

என்று எளிமைப்படுத்தியுள்ளனர். ‘இதற்கு அந்தப் பருத்தி மூட்டை கோடோன்லயே இருந்திருக்கலாம்’ என்று தான் படத்தின் கருவை நினைத்துப் பரிதாபப்பட முடிந்தது.

படத்தில் ஒரு விதவைத் தாயும், அவரது பதிமூன்று வயது மகளும், நாயகியின் பக்கத்து வீட்டினராக வருகிறார்கள். அந்த மகள், தனது தாய்க்கு வரன் தேடும் பெரிய மனுஷி. “நீ எனக்குத் துணை தேடுறது இருக்கட்டும். நான் உனக்கு நல்ல பையன் பார்த்துட்டேன்” என்கிறார் அந்தம்மா. பதிமூன்று வயது பெண், தன் சக வயதினனுடன் பேசுவதை, ஒரு நட்பாகப் பார்க்க முடியாமல், ‘காதல்’ என முடிவு செய்து மகிழுகிறார் அந்தத் தாய். குழந்தைகளின் செயல்களை அவர்களது இயல்பெனப் பார்க்காமல், பேசினாலே காதல்தான் என நினைக்கும் அந்தத் தாயின் செயல், “சைல்ட் அப்யூஸ்”-இல் வராதா?

ஸ்வாதி எனும் பாத்திரத்தில் நய்லா க்ரெவால் நடித்துள்ளார். டாப்சியினுடைய சகோதரனின் காதலி. படத்தின் முதல் ஃப்ரேமே சுதந்திரப் பறவையான அவரது மகிழ்ச்சியில் இருந்தே படம் தொடங்குகிறது. ” நாம லவ் பண்றோம். சந்தோஷமாக இருக்கோம்” என சின்ன இடைவேளை விட்டு, “பெரும்பாலும்” எனச் சொல்லிவிட்டு, “பின்ன ஏன் கல்யாணம் பண்ணிக்கணும்? இப்படியே இருந்துடலாம்ல?” என்ற கேள்வியெழுப்புகிறார். பாசாங்கு இல்லாத பாத்திரம் என்றால், படத்திலேயே இவர்தான். தனக்குத் தவறெனப்படுவதை அந்த இடத்திலேயே கேள்வியெழுப்பத் தயங்காதவராக இருக்கிறார். ‘நான் இத்தனை நாள் சரியாக நடந்துக்காம உன்ன ரொம்ப டிஸ்-அப்பாயின்ட் பண்ணிட்டேன். என்னை ரீபூட் பண்ணிக்க ஒரு வாய்ப்புக் கொடு’ என காதலன் கேட்கும்பொழுது, அவனை அரவணைத்துக் கொள்ளுமளவு காதலுடன் இருக்கிறார். ‘டாப்சியா இந்தப் படத்துக்கு ஹீரோயின்? சுதந்திரப் பறவையான நான்தான் கதாநாயகி என ஏன் உங்க யாருக்கும் தோணலை?’ என தானேற்ற அழகான கதாபாத்திரத்தின் வாயிலாக முகத்தில் அறைகிறார் நய்லா.

பிற்சேர்க்கை: சமூக ஊடகங்களை அவதானித்த வகையில், பெண்களின் பார்வையில், இப்படம் பெண்களின் சுயமரியாதையை மிக அழுத்தமாகப் பதிந்துள்ளது என வியந்தோதப்படுகிறது. டாப்சியின் அவமானத்தைப் பெண்களால் மிக நெருக்கமாக உணர முடிவதால், அவர்களால் விவாகரத்து என்ற முடிவை நியாயமானதாகக் கருத முடிகிறது. ஆண்களின் பார்வையிலோ, ‘ஒரே ஒரு அறைக்கு விவாகரத்தா? ஆத்தீ..’ எனக் குழப்பத்தை விளைவித்துள்ளது. 

பின் குறிப்பு: இந்த விமர்சனம் ஓர் ஆணால் எழுதப்பட்டது.

நன்றி: http://ithutamil.com/

அய்யப்பனும் கோஷியும் விமர்சனம்

அய்யப்பனும் கோஷியும் விமர்சனம்

மனிதன் ஒரு மகத்தான சல்லிப்பயல்’ என எழுத்தாளர் ஜி. நாகராஜன் ஒரு வரியில் சொன்னதை மூன்று மணி நேரத் திரைப்படமாகக் கண்முன்னால் விரிய வைத்திருக்கிறார் இயக்குநர் சச்சி. முன்னரே பிரித்வி, பிஜூ மேனன் கூட்டணியில் லட்சத்தீவின் பின்னணியில் அனார்க்கலி என்ற சுவாரஸ்யமான காதல் கதையைச் சொன்ன, ‘ட்ரைவிங் லைசென்ஸ்’ திரைப்படத்திற்குத் திரைக்கதை எழுதிய அதே சச்சிதான் இவர்.

உண்மையில் இது இரண்டு மனிதர்களுக்கு இடையிலான தனிப்பட்ட தன்முனைப்பு சார்ந்த போராட்டம் என்பதுபோல தோன்றினாலும் அதனூடே உண்மையில் அதிகாரம் என்பது எப்படி எந்தெந்த வகையில் யார் யாருக்காகவெல்லாம் வளைந்து கொடுக்கத் தயாராக இருக்கிறது என்பதையும் பூடகமாக உணர்த்திச் செல்கிறது என்பதனால்தான் இந்தத் திரைப்படம் முக்கியமானதாகிறது.

பொதுவாக இந்தத் திரைப்படத்தை கோஷிக்கும் ஐயப்பனுக்கும் இடையில் நடக்கும் தன்முனைப்பு போராட்டமாக மட்டுமே பலரும் அடையாளப்படுத்துகிறார்கள். ஆனால் மூன்றுவிதமான போராட்டங்கள் இந்தப் படத்தின் மூலமாக வெளிப்படுகின்றன. கோஷிக்கும் ஐயப்பனுக்கும் இடையில் நடக்கும் சண்டைதான் பிரதானம் என்றாலும், கோஷிக்கும் கோஷியின் தகப்பனான குரியனுக்கும் இடையில் நடக்கும் போராட்டமும் மிக முக்கியமானது. இந்த இரண்டு போராட்டங்களுக்கும் நடுவில் அதிகார வர்க்கத்திற்கும்அதற்கு வளைந்து போகாத மனிதனுக்கும் இடையில் நடக்கும் போராட்டமும் சொல்லப்பட்டிருக்கிறது.

இராணுவத்தில் பணிபுரிந்து ஓய்வுபெற்ற ஹவில்தார் எனத் தன்னை அறிமுகப்படுத்திக் கொள்ளும் கோஷியினுடைய கதாபாத்திரம் ஊசலாடும் தன்மையோடு படைக்கப்பட்டிருக்கிறது. ஆகவே தனது தந்தை செய்யும் தவறுகளுக்கும் தான் விலை கொடுக்க வேண்டிய நிலை வரும்போது கோஷியின் மனம் தடுமாறுகிறது. அதுவே ஐயப்பனுக்கு எதிரான போராட்டத்தில் ஆங்காங்கே அவனை நிலைகுலைய வைக்கிறது. இறங்கி வர நினைக்கலாமென எண்ணும்போதே சூழல்கள் மீண்டும் கோஷியை நியாயப்படுத்தத் தூண்டுகின்றன.

ஐயப்பனின் கதாபாத்திரம் கொஞ்சம் மங்கலாக இருக்கிறது. ஏனெனில் சில விஷயங்கள் பூடகமாகச் சொல்லப்பட்டு விடுகின்றன. உதாரணமாக ஐயப்பனுக்கு நடந்த திருமணம் குறித்த பின்னணி ஓர் அவசரகதியில் அளிக்கப்பட்டு அள்ளித் தெளிக்கப்பட்டு இருக்கிறது. ஆனால் ஐயப்பன் தான் எடுக்கும் முடிவுகளில் மிகத் தெளிவானவனாகவே இருக்கிறான். தன் பழைய சுபாவங்களிலிருந்து மீண்டு நேர்மையான காவல் அதிகாரியாக வாழ்பவனாக இருக்கிறான் ஐயப்பன்.

இப்படி, கதாபாத்திரங்களின் குணாதிசயங்களின் வரையறைகள் மிகச் சிறப்பாக செய்து இருப்பதாலேயே ஊசலாடும் ஒரு மனநிலை உள்ளவனுக்கும், தெளிவான சிந்தனை கொண்ட ஒரு காவல்துறை அதிகாரிக்குமான மோதல் என்பதுஇருக்கை நுனிவரை நம்மைக் கட்டிப் போட போதுமானதாக இருக்கிறது.

காவல்துறை உதவி ஆய்வாளராக இருக்கும் ஐயப்பனுக்கும் தற்காலிகப் பதவி நீக்கம் செய்யப்பட்ட பின் இருக்கும் ஐயப்பனுக்கும் இடையிலான வேறுபாடுதான் திரைக்கதையின் மையச் சரடு. இந்தச் சரட்டை மிகப் பலமானதாக உருக்குக் கம்பி போல உருவாக்கி இருப்பதால்தான் அதைச் சார்ந்த கிளைச் சம்பவங்களை அடுத்தடுத்துச் சொல்வதென்பது குறிப்பாக அதிகாரவர்க்கம் தனக்கு வேண்டியவர்களுக்கு எப்படி எல்லாம் வளைந்து நெளிந்து கொடுக்கிறது திரைக்கதை ஆசிரியரான சச்சிக்கு இயல்பாகக் கைவந்திருக்கிறது.

அடுத்த 2 ஆண்டுகளில் ஓய்வு பெற இருக்கும் நேர்மையான காவல் அதிகாரியான ஐயப்பன், முதலமைச்சரிடமிருந்து பதக்கம் பெறவிருக்கும் நிலையில், உயர் அதிகாரியின் கட்டளைக்காக வேலை நேரத்தில் செய்த பிழைக்காக தற்காலிகப் பதவி நீக்கம் செய்யப்படுகிறான். ஓர் உதவி காவல் ஆய்வாளரின் நிலை பணத்திமிரும் குடிவெறியும் கொண்ட சராசரி குடிமகன் ஒருவனால் பந்தாடப்படும் போது அதை எதிர்கொள்ள அவன் எப்படி ஆயத்தம் ஆகிறான் என்பதும் இந்தக் கதையின் நோக்கமென்றாலும், இறுதியில் அந்த நேர்மையான அதிகாரிக்கு எதிராக எவன் செயல்பட்டானோ, அவனே இறங்கி வந்து அவன் மூலமாகவே மீண்டும் காவல்துறை அந்த உதவி ஆய்வாளருக்குச் சீருடையைத் திரும்ப அணிய வைக்கும் சூழல்தான் அமைகிறது என்பதுதான் மிகப்பெரிய நகைமுரண். ஆனால் அதுவேதான் இந்தத் தேசத்தின் நிலையும், கூட வசதியும் வாய்ப்புகளும் இருப்பவர்களுக்கு சட்டம் நீதி எல்லாம் பணத்தின் மூலமாக சம்பாதிக்கக்கூடிய ஒன்றாகவே இருக்கிறது என்பதாகவும் கூட இந்தக் கதையை நாம் புரிந்துகொள்ளலாம்.

இந்தப் படத்தின் மிக முக்கியமான விஷயமாக நான் கருதுவது இந்தப் படத்தின் முக்கிய கதாபாத்திரங்களில் தோன்றிய நடிகர்களின் அபாரமான நடிப்பாற்றல்தான். எப்போதுமே நான் வியக்கக்கூடிய ஒரு விஷயமும் கூட. இரண்டு நாயகர்கள் இரண்டு கதாபாத்திரங்கள் இதில் யாருக்கு பலம் அதிகம் என்ற தன்முனைப்பு இல்லாமல் தங்கள் கதாபாத்திரங்களில் தாங்கள் வாழ்ந்து காட்டுவதன் மூலமாக மட்டுமே தங்களது திறமையை வெளிப்படுத்த முடியும் என்ற எண்ணமும் ஆற்றலும் உறுதியும் தன்னம்பிக்கையும் மலையாள நடிகர்களுக்கு இருக்கிறது என்பதால்தான் இதுபோன்ற படங்களும் பாத்திரங்களும் மலையாளத் திரைப்படங்களில் சாத்தியமாகிறது. பிஜு மேனனும் சரி, பிரித்வி ராஜனும் சரி அமர்க்களப்படுத்தி இருக்கிறார்கள். அதிலும் குறிப்பாக பிஜு மேனன் இடைவேளைக்குப் பிறகு மதம் கொண்ட யானையின் சீற்றத்தோடு நடத்தும் அடாவடித்தனங்கள் அத்தனையும் சபாஷ் போட வைக்கின்றன. பிஜு மேனனின் அந்த சுனாமியின் முன் பிரித்வி நீச்சல் போட்டதே பெரிய விசயம்தான்.

ஐயப்பனின் மனைவியிடம் ஏகத்திற்கும் ஏச்சு வாங்கி கூனிக்குறுகி நிற்கும் பொழுதில் ஐயப்பன் கோஷியிடம் வந்து, “வயிறு நெறச்சு கிட்டியோ?” என்று கேட்கும்போது ஒரு அளவுக்குஎன்று பிரித்வி பம்மிப்பதுங்கும் காட்சி கொள்ளை அழகு (இப்படி ஒரு காட்சியில் எந்தத் தமிழ் முன்னணி நடிகரும் நடிக்க ஒப்புக்கொள்வார்களா என்பது வேறொரு கேள்வி). அந்த இடத்தில் கண்ணம்மாவாக நடித்திருக்கும் கௌரி நந்தாவின் வசன உச்சரிப்பும், ஆங்காரம் மிகுந்த உடல் மொழியும் வசனங்களும் வெகு கச்சிதம்.

வழக்கம்போலவே எந்த நடிகரும் சோடை போகவில்லை. குறிப்பாக பிரித்வியின் தந்தையாக வரும் இயக்குனர் ரஞ்சித் ஒரு ஆணாதிக்கவாதியான, பழம்பெருமை பேசக்கூடிய ஆணவ சாதிக்காரனைப் போல தன் பெருமை பேசிக்கொண்டு இருக்கக்கூடிய ஒரு பழைய பூர்ஷ்வாத்தனத்தோடு நடக்கக்கூடிய பெரிய மனிதனின் உடல் மொழியை இயல்பாகக் கடத்தி இருக்கிறார். ஆய்வாளராக வரும் அனில் நெடுமங்காடு, காவலராக வரும் அனு மோகன் ஆகியோரும், பெண்காவலர் ஜெஸ்ஸியாக நடித்திருக்கும் தன்யாவும் தங்கள் பங்குகளைச் சிறப்புற செய்திருக்கிறார்கள்.

படத்தில் இயக்குநரான சச்சியே திரைக்கதையையும் அமைத்திருப்பது மிகப்பெரிய பலமாக அமைந்திருக்கிறது. அதற்கு உற்ற துணையாக ஒளிப்பதிவும் அமைந்திருக்கிறது. அட்டப்பாடியில் இயற்கை வளம் சூழ்ந்த அத்தனை காட்சிகளையும் அழகுற உள்வாங்கியிருக்கிறது சுதீப்பின் கேமரா. கண்ணில் ஒற்றிக் கொள்ளலாம் போல அத்தனை அழகான சட்டகங்கள். குறிப்பாக, ஐயப்பன் ஒரு மரத்தினடியில் இருக்கும் பென்ச்சில் அமர்ந்திருக்கையில் ஓரமாகத் தூளியில் குழந்தை இருக்கும் அந்த ஒற்றைக் காட்சி.

அட்டப்பாடி என்பது ஆதிவாசிகள் பெருமளவில் வசிக்கும் பகுதி. அவர்களது நிலங்களைப் பெருமுதலாளிகள் சுரண்டிக் கொண்டிருக்கிறார்கள். சாராயம் கொடுத்து அவர்களை ஏமாற்றுகிறார்கள் என்பதால் அந்தப் பகுதியில் சாராயம் தடை செய்யப்பட்டதாக இருக்கிறது. என்ற போதும் கூட இந்தப் பகுதியில் ஆதிவாசிகளுக்கு எதிரான வன்கொடுமைகள் தொடர்ந்து நடந்து கொண்டே இருக்கின்றன. சமீபத்தில் கூட ஒரு ஆதிவாசியை மரத்தில் கட்டிவைத்து அடித்தே கொன்ற செய்தியை பார்த்து நாம் பதறி இருக்கிறோம். ஆகவே அட்டப்பாடியின் பின்னணியில் நடக்கக்கூடிய இந்தக் கதையில் அட்டப்பாடி ஆதிவாசிகளின் மலையாளமும் தமிழும் கலந்த ஒரு வினோத மொழியில் அவர்கள் பாடுகின்ற நாட்டுப்புற பாடல்களை மிக அழகாகவும் செய்நேர்த்தியோடும் மிகச் சரியான இடங்களில் புகுத்தி இருப்பதன் மூலம் தனது பின்னணி இசைக்கு புதிய பரிமாணத்தை வழங்கியிருக்கிறார் இசையமைப்பாளர் ஜேக்ஸ் பிஜோய். இதுவரை கேட்டறியாத நஞ்சியம்மை என்ற ஆதிவாசிப் பெண்ணையே அவர் எழுதிய பாட்டை படத்தில் உபயோகப்படுத்தி இருப்பதன் மூலம் மிக முக்கியமான காட்சிகளில் அதன் தரத்தை வேறொரு தளத்திற்கு எடுத்துச் சென்றிருக்கிறார் இயக்குநர். மிகுந்த பாராட்டுக்குரிய செயல் இது.

மலையாள சினிமா ஏன் தனித்துவம் பெறுகிறது என்பதற்கு இத்திரைப்படத்தில் பல காட்சிகள் சான்று பகர்கின்றன. கண்ணம்மா காவல் நிலையத்தில் காவலர்களுடன் பேசுகின்ற காட்சியும் சரி, அதைப்போலவே ஐயப்பனும் கோஷியும் தனியாக வனப்பகுதியில் பேசிக்கொள்ளும் காட்சியும் சரி முற்றிலும் வேறு ஒரு பரிமாணத்தில் இருக்கின்றன. திரைப்படத்தில் பட்டுத்தெறித்தாற் போல் வருகின்ற வசனங்களில் கூர்மை மீண்டும் மீண்டும் நம்மை வியப்புக் கொள்ளவும், அதே நேரத்தில் வென்று வாய் பிளக்கவும் வைக்கின்றன.

மூன்று மணி நேரம் படம் என்பது மட்டுமே மிகப்பெரிய குறை என்று சிலர் அலுத்துக் கொள்கிறார்கள். ஆனால் மூன்று மணி நேரம் இருக்கையிலேயே சுவாரசியம் குறையாமல் நம்மைக் கட்டிப் போடுவது என்பது ஒரு மிகப்பெரிய கலை. ஆனால் படத்தில் ஒரு முக்கியமான குறை இருக்கிறது. உயர் அதிகாரி சொன்னார் என்பதற்காக, காவல் நிலையத்தில் வைத்தே ஐயப்பன் கோஷிக்காக மது ஊற்றிக் கொடுக்கும் போது, அதை கோஷி அவருக்குத் தெரியாமல் வீடியோ எடுக்கிறார். எதிரில் இருப்பவனைப் பற்றித் தெரிந்திருந்தும் ஐயப்பன் அஜாக்கிரதையாக அதைக் கவனிக்காமல் விட்டுவிடுவதுதான் அந்தக் குறை. ஆனால் அது இல்லாவிட்டால் மூன்று மணி நேர சுவாரஸ்யம் இல்லாமல் போயிருக்குமே!?

மசாலாப் படங்கள் என்றால் நான்கு பாடல்கள், ஐந்து சண்டை, பஞ்ச் டயலாக், அதிநாயகத் தன்மைகள் என்று குண்டுச் சட்டியில் குதிரை ஓட்டிக் கொண்டிருக்கும் மசாலா பட இயக்குநர்கள், ஒரு மசாலா படத்தையே எப்படி ரசிக்கும் விதமாக அழகுற மசாலா தூக்கலாக இல்லாமல் மிகச் சிறப்பாகத் தரமுடியும் என்பதை கற்றுக்கொள்ள இந்தத் திரைப்படம் அருமையானதொரு வாய்ப்பு.

ஆசிப் மீரான்

http://ithutamil.com/—————————————————————————————————————-

மது வடலாரா விமர்சனம்

மது வடலாரா விமர்சனம்

நாயகனும், நாயகனின் நண்பனும் ஒரு ஆன்லைன் டெலிவெரி கம்பனியில் டெலிவெரி பாய்ஸாக வேலை செய்கிறார்கள். நாயகனின் நண்பன் கேஷ் ஆன் டெலிவெரி பண்ணும்போது கஸ்டமர் கண்ணிமைக்கும் நேரத்தில் ஒரு நோட்டை மறைத்துவிட்டு, “சார் 500 ரூபாய் குறையுது, 100 ரூபாய் குறையுது” என ஏமாற்றிப் பணத்தை அபகரிப்பார்.

இதைப் பார்த்த நாயகனும் அதைப் போல முயற்சி செய்யப் போக, அவன் பல சிக்கல்களில் மாட்டுவதுதான் கதை. வித்தியாசமான மேக்கிங்கால் கவர்ந்துள்ளார் இயக்குநர்.

ஒரு கஸ்டமர். அதுவும் பாட்டி. அப்பாட்டியை ஏமாற்ற முயன்று, அப்பாட்டியிடம் மாட்டிக் கொள்கிறார் நாயகன். அங்கிருந்து தப்பிக்க முயற்சி செய்யும்போது பாட்டி இறந்து விடுகிறார். பாட்டியின் பிணத்தை மறைக்க அந்த வீட்டுக்குள் போய், அது தேவையில்லாமல் பெருஞ்சிக்கலில் இழுத்துவிட்டு விடுகிறது.

அதைச் சமாளிக்க முடியாமல் அவ்வீட்டிலேயே மயங்கிவிடும் நாயகன், மீண்டும் விழிக்கும் பொழுது, ரத்தத்தால் தோய்ந்த பிணத்தின் அருகில் கிடப்பதை உணர்கிறார். என்ன ஏதென்று புரியாமல், அலறியடித்தவாறு தனது டெலிவெரி பேக் எடுத்துக் கொண்டு, வீட்டுக்கு வந்தால், அந்த பையில் 50 லட்சம் பணமிருக்கிறது.

பைக்குள் இருந்த டெலிவரி பார்சல்களை எடுக்க மறுபடியும் அந்த வீட்டுக்கு நண்பர்களோடு செல்கின்றான் நாயகன். அங்கே அவனுக்கு பல அதிர்ச்சிகள் காத்துக் கொண்டிருக்கின்றன. பாட்டி என்னானார், நாயக்ன் அருகில் இறந்து கிடந்தது யார், யார் நாயகனை அந்தக் கொலைவழக்கில் சிக்க வைத்தது என பயங்கர ட்விஸ்ட்களாகப் படம் பயணிக்கிறது.

படத்தின் நாயகன் ஸ்ரீ சிம்ஹா, பாகுபலி பட இசையமைப்பாளர் கீரவாணியின் இளைய மகன் என்பது குறிப்பிடத்தக்கது. அவருக்குப் பக்க துணையாக நகைச்சுவையில் கலக்கியுள்ளார் சத்யா. எழுதி இயக்கியுள்ள இளம் இயக்குநர் ரித்தேஷ் ராணாவிற்கு இது முதற்படம். ‘மது, வீட்டுக்கும் நாட்டுக்கும் கேடு’ என பாட்டியின் குரலில் ஆரம்பிக்கும் படம் நெடுகேவும் நகைச்சுவைக்குப் பஞ்சமில்லை. குறிப்பாக, படம் நெடுகே ஒரு டிவி சீரியல் காட்டப்படுகிறது. அச்சீரியலில், நெற்றியில் சுடப்படும் நாயகன் செய்யும் அட்ராசிட்டிகள் அதகளம். அவர்கள் கலாய்த்துள்ள நெடுந்தொடரின் மூலம், சன் டிவியில் வந்த ஒரு தமிழ் சீரியல் என்பது குறிப்பிடத்தக்கது.

வித்தியாசமான த்ரில்லிங் படவிரும்பிகளுக்கான படமிது. நாயகன் அந்த வீட்டில் மாட்டுனதிலிருந்து, அவன் தப்பிப்பானா மாட்டானா, இதெல்லாம் யார் செய்றா என சீட் நுனிக்கு கொண்டு வந்துவிடுகின்றனர். கதாநாயகியும், பாடல்களும் இல்லாத இந்த த்ரில்லர் படம், அமேசான் ப்ரைமில் காணக் கிடைக்கிறது.

– ரமேஷ் சுப்புராஜ்

நன்றி: http://ithutamil.com/

கண்ணும் கண்ணும் கொள்ளையடித்தால் விமர்சனம்

கண்ணும் கண்ணும் கொள்ளையடித்தால் விமர்சனம்

Description: Kannum-kannum-kollaiyadithaal-review

இடைவேளையின் பொழுது ஓர் எதிர்பாராத ட்விஸ்ட், படத்தின் முடிவில் புன்னகையை வரவைக்கும் ஒரு ட்விஸ்ட் என படம் ஸ்வீட் சர்ப்ரைஸாய் வந்துள்ளது.

படத்தின் தலைப்பைக் கொண்டே இது ஓர் அழகான காதல் படமென யூகிக்கலாம். அப்படிக் காதல் படமாக மட்டும் தேங்கிவிடாமல், ஆன்லைன் குற்றத்தையும், டெக்னிக்கல் குற்றத்தையும், அவற்றை நூல் பிடித்துத் தொடரும் காவல்துறையின் சாமர்த்தியத்தையும் அழகாகக் கலந்து கொடுத்துள்ளார் இயக்குநர் தேசிங் பெரியசாமி.

துல்கர் சல்மானும், ரிது வர்மாவும் ஒரு காதல் ஜோடி என்றால் விஜய் டிவி புகழ் ரக்‌ஷனும், நிரஞ்சனி அகத்தியனும் ஒரு காதல் ஜோடியாக வருகின்றனர். படத்தை மைய இணைக்கு நிகரான ஒரு ஜோடியாகக் கலக்கியுள்ளனர். சொப்பு பொம்மை போலிருக்கும் சன்னி (Sunny) வகை ஸ்கூட்டரைக் காட்டி நாயகியை அறிமுகப்படுத்த, நிரஞ்சனி அகத்தியனை தண்டர்பேர்ட் புல்லட்டில் அறிமுகப்படுத்துகின்றனர். அவரது அலட்சியம் கலந்த பார்வையும், கெத்தான உடற்மொழியும் ரசிக்கும்படி தனித்துத் தெரிகிறது. இவர் படத்தில் உடை வடிவமைப்பாளராகப் பணிபுரிய வந்தவர் என்பது குறிப்பிடத்தக்கது. காளீஸ் என்ற கதாபாத்திரத்தில், நாயகனின் நண்பனாக வரும் ரக்‌ஷனும் ரசிக்க வைக்கிறார்.

டிசிபி பிரதாப் சக்கரவர்த்தியாக கெளதம் வாசுதேவ் மேனன் அசத்தியுள்ளார். தேசிங் பெரியசாமி, கெளதம் வாசுதேவ் மேனனை எப்படி நடிக்க வைத்தால் பார்வையாளர்கள் ரசிப்பார்கள் எனத் துல்லியமாய்க் கணித்து உபயோகித்துள்ளார். படம் முடிந்து ரசிகர்களைப் புன்னகையோடு வெளிவர வைப்பதில் முக்கிய பங்காற்றியுள்ளார் கெளதம் வாசுதேவ் மேனன். கெளரவத் தோற்றம் என்று போகும் அவரது ஆக்டிங் கேரியர்க்கு இப்படம் நல்லதொரு பிரேக்கை அளிக்கும்.

ரிது வர்மா சுவாரசியமாக, நகைச்சுவையாக, போரடிக்காமல் படம் போகிறது. பாடலுக்கும் காதலுக்கும் என்று மட்டுமில்லாமல், ரிது வர்மா படத்தின் முக்கிய் திருப்புமுனைக்கு உதவும் கதையின் நாயகியாகவும் வருவது சிறப்பு. வழக்கம் போல் துல்கர் சல்மான் இளமைத் துள்ளலுடன் படம் நெடுகே ரசிக்க வைக்கிறார்.

அறிமுக இயக்குநரின் படமெனத் தெரியாதளவிற்கு மிக அற்புதமாய் படத்தை உருவாக்கியுள்ளார் தேசிங் பெரியசாமி. சூதும் வாதும் ஒரு ஃபன் (fun) என்பது போல் படம் பயணிப்பது மட்டுமே ஒரு குறை. வயாகாம் 18 ஸ்டுடியோஸ் தனது லோகோவில், ‘கண்ணும் கண்ணும் கொள்ளையடித்தால்’ என்ற தமிழ்ப் படத்தையும் இணைத்துக் கொள்ளலாம். நன்றி: http://ithutamil.com/

கன்னிமாடம் விமர்சனம்

கன்னிமாடம்! திரை விமர்சனம்

கன்னிப் பெண்கள், கர்ப்பினிப் பெண்கள், பெண் துறவிகள் என பெண்கள் தனியே தங்கும் இடத்திற்குப் பெயர் கன்னிமாடம் ஆகும். இந்தப் படத்தின் நாயகியான மலர்க்கோ தங்க ஓரிடம் இல்லா
மல் தவிக்கிறார். படத்தின் தகிப்பிற்குக் காரணமோ, படம் தொட்டுள்ள ஆணவக்கொலை எனும் விஷயமாகும்.

நாயகன் அன்புவின் தங்கையை, அவனது தந்தையே சாதி ஆணவத்தில் படுகொலை செய்து விடுகிறார். தன் குடும்பமே சிதைந்துவிட்டது என வருத்தத்தில் இருக்கும் அன்பு, சென்னைக்கு ஓடி வரும் மலர் – கதிர் ஜோடியை அரவணைக்கிறான். கதிர் விபத்தில் இறந்து விட, நிராதரவாய் இருக்கும் கர்ப்பிணியான மலரைப் பாதுகாக்கும் பொறுப்பு அன்புவிற்கு ஏற்படுகிறது. இந்தச் சமூகக் கட்டமைப்பில் அது அத்தனை எளிதான காரியமா என்ன? அன்புக்கு நேரும் சோதனையும் சவால்களும் தான் படத்தின் கதை.

‘இன்னுமா சாதி பார்க்கிறாங்க?’ என அப்பாவித்தனமாய்க் கேட்கும் கவுன்சிலர் அழகுராணியாக ரோபோ ஷங்கரின் மனைவி பிரியங்கா நடித்துள்ளார். அவரது அறிமுகத்தின் போது, அவரது உருவத்தினைக் கேலி செய்வது போன்ற கேமிரா கோணத்தினை இயக்குநர் போஸ் வெங்கட் தவிர்த்திருக்கலாம். ஏனெனில், படம் முழுவதும் பெரியாரிசத்தையும் ஒரு கதாபாத்திரமாகக் கொண்டு வந்துள்ளார் எனும்போது உருவு கண்டு நகையாடுவதான விஷயத்தைத் தவிர்த்திருக்கலாம். ‘வாயும் வயிறுமாக என்ன 40 வருஷமா இருப்பீங்களா?’ என்ற முருகதாஸின் வசனமும் ‘பாடி ஷேமிங்’ வகையைச் சார்ந்தது. அழகுராணி பாத்திரத்திற்கு பிரியங்கா கச்சிதமாகப் பொருந்தியுள்ளார்.

‘ஸ்கொயர் ஸ்டார்’ ஆகும் நடிப்புக் கனவில் வருடங்களைத் தொலைத்த பாத்திரத்தில் சூப்பர் குட் சுப்பிரமனியன் ரசிக்கும்படி நடித்துள்ளார். ஸ்டெல்லாவாக நடித்துள்ள வலீனா பிரின்ஸின் கதாபாத்திரத்தை இன்னும் வலுவாக உருவாக்கியிருக்கலாம்.

வாகனங்கள் மீது பிரியமுள்ள கதிராக விஷ்ணு ராமசாமி நடித்துள்ளார். படத்தின் நாயகன் ஸ்ரீராம் கார்த்திக் அன்பு எனும் பாத்திரத்தில் நடித்துள்ளார். கதாபாத்திரத் தேர்விலேயே இயக்குநர் போஸ் வெங்கட் பாதி வெற்றியினை உறுதி செய்துவிடுகிறார். முக்கியமாக, மலராக நடித்திருக்கும் சாயா தேவி அருமையான சாய்ஸ். அவரது அகத்தை இன்னும் கொஞ்சம் தொட்டிருந்திருந்திருக்கலாம். ஆனாலும், கதையின் கரு ஆணவக் கொலை என்பதால், அது ஒரு குறையாகத் தெரியவில்லை.

முதல் படத்திலேயே, பெரியாரின் புகைப்படத்தையும், அவரது கோட்பாட்டையும் படம் நெடுகே உலாவ விட்டு அசத்தியுள்ளார் போஸ் வெங்கட். மேலும் அதிர்ச்சியான க்ளைமேக்ஸ் மூலம், சமூகத்தின் கோர முகத்தையும், அதை பொறுத்துக் கொள்ள முடியாத தனிமனிதனின் மனசாட்சியையும் அழுத்தமாகப் பதிந்துள்ளன படம்.

திரெளபதி விமர்சனம்

                    

தென்னாற்காடு, வட ஆற்காடு மாவட்டங்களில் ‘திரெளபதி அம்மன்’ கோயிலும், அக்கோவிலில் நிகழும் சித்திரை தீ மிதி திருவிழாவும் மிகவும் பிரசித்தி. விழுப்புரம் மாவட்டம் சேந்தமங்கலத்தில் கதை நிகழுவதாகக் காட்டப்படும் இப்படத்தின் பிரதான பெண் பாத்திரத்தின் பெயர் திரெளபதி. ஊருக்கு ஒன்றெனில் முதலாளாக முன்னிற்கும் தைரியமான பெண்மணி. இவரைப் போலவே, படத்தில் இன்னும் இரண்டு பெண் பாத்திரங்களும் வலுவானதாகச் சித்தரிக்கப்பட்டுள்ளன. அவர்கள் முறையே ஓர் அரசு மருத்துவரும், ஒரு பத்திரிகையாளரும் ஆவர். தைரியமான பெண் என்பதற்கான குறியீடாய் இத்தலைப்பினைக் கொள்ளலாம்.

பரபரப்புக்குப் பஞ்சம் இல்லாத ட்ரெய்லரின் மூலம் அருமையான கவன ஈர்ப்பினைப் பெற்றுவிட்டது படம். படத்தின் வில்லனாக இயக்குநர் யாரைச் சுட்டுகிறார் என உள்ளங்கை நெல்லிக்கனி போல் தெளிவாகத் தெரிகிறது. எனினும், மிகப் புத்திசாலித்தனமாய், ஒரு பொதுப் பிரச்சனையைப் பற்றிப் படம் பேசுவது போல் ஒரு திரைக்கதை அமைத்து, எதிர்ப்புக் குரல்களை அமுங்கச் செய்துள்ளது இயக்குநரின் சாமர்த்தியத்தைப் பறைசாற்றுகிறது.

சம்பந்தப்பட்டவர்கள் பத்திரப்பதிவு அலுவலகத்திற்கு வராமலேயே, அவர்களின் சம்மதம் இல்லாமலேயே, யாருக்கு வேண்டுமானாலும் யாருடன் வேண்டுமானாலும் திருமணமாகிவிட்டதென பத்திரமும், நிலத்தை உரிமையாக்கும் பத்திரமும் மோசடியாகத் தயார் செய்யப்பட்டு வருகின்றன. அரசு இயந்திரத்தின் லஞ்சலாவண்யத்தைப் பயன்படுத்தியோ, அல்லது வழிக்கு வராத அரசு ஊழியர்களை மிரட்டியோ, ஒரு கும்பல் இம்மோசடியை ஒரு தொழிலாகவே செய்து வருவதாக இயக்குநர் மோகன் பகிரங்கக் குற்றச்சாட்டை வைத்துள்ளார். இப்படத்தின் கதை இக்குற்றத்தை மையப்படுத்தியே!

செய்யாத கொலைகளுக்காக, சாதி வெறியில் ஆணவக் கொலை செய்தவர் எனக் குற்றம் சாட்டப்பட்டு சிறை தண்டனை பெறுகிறார் ருத்ர பிரபாகர். பெயிலில் வரும் அவர், தன் மனைவியின் சபதத்தை நிறைவேற்ற நினைக்கிறார். பாஞ்சாலியின் சபதத்தால் அன்று (!?) மண்ணாசை கொண்ட கெளரவர்கள் அழிந்தார்கள். இப்படத்து திரெளபதியின் சபதத்தால், புறவாசல் வழியாக மண்ணை அபகரிக்க நினைத்த கோலா நிறுவனத்தின் சதி முறியடிக்கப்படுகிறது. கோலா நிறுவனத்துக்கு மண்ணைத் தாரை வார்க்க, பெண்ணைக் கேடயமாகப் பயன்படுத்துகிறான் வில்லன். இப்படியாகப் பின்னப்படும் சதியை ருத்ர பிரபாகரன் எப்படி அம்பலப்படுத்தி திரெளபதியின் சபதத்தை நிறைவேற்றுகிறார் என்பதுதான் படத்தின் க்ளைமேக்ஸ்.

மீசையை முறுக்கும் வேலையை அழகாகச் செய்துள்ளார் ரிச்சர்ட் ரிஷி. டுலெட், அசுரவதம், கும்பளாங்கி நைட்ஸ் போன்ற படங்களில் யதார்த்த நடிப்பை வெளிப்படுத்தியிருந்த ஷீலா ராஜ்குமார், இப்படத்தில் திரெளபதியாகச் சீறியுள்ளார். பெண்ணை மையப்படுத்திய படத்திற்குக் கச்சிதமான தேர்வு என நிரூபித்துள்ளார். மருத்துவராக லேனாவும், பத்திரிகையாளராக செளந்தர்யாவும் நிறைவான நடிப்பை வழங்கியுள்ளனர்.

போலிப் பத்திரப் பதிவிற்கு எதிரான பொதுநல வழக்கை நீதிமன்றத்தில் தாக்கல் செய்யும் வழக்குரைஞர் குருதேவாகக் கருணாஸ்க்கு ஏற்ற பாத்திரத்தை வழங்கி, படத்திற்குக் கூடுதல் மைலேஜை நாசூக்காகக் கூட்டியுள்ளார் இயக்குநர் மோகன். ‘குரு’தேவ் என்பதுமே காரணப் பெயரன்றி வேறென்ன?

திரெளபதியின் மிரட்டல் தொடரும் என அடுத்த பாகத்திற்கான அச்சாரத்தோடு இயக்குநர் முடித்துள்ளார். கிரெளட் ஃபண்டிங் முறையில் தயாரிக்கப்பட்ட இப்படத்தின் முதலீடு குறைவெனினும், ஜுபினின் இசையும், மனோஜ் நாராயணின் ஒளிப்பதிவும், தேவராஜின் படத்தொகுப்பும், மேக்கிங்கில் எந்தக் குறையும் ஏற்படாதவண்ணம் கச்சிதமாக உதவியுள்ளன. முழுப் பூசணிக்காயைச் சோற்றில் மறைத்த கதையாக, பத்திர மோசடி என்ற கருவின் பின்னால் தனது சார்பரசியலை நைச்சியமாக மறைத்துள்ளார் மோகன்.

நன்றி: http://ithutamil.com/